PIDATO ADAT

      Ampun baribu kali ampun

Kapado sidang jo majilih

Jari nan sapuluah ambo susun

Boro moo kami badiri.

Dubalang jo ompang limo

Saroto nanti jo pagawai

Ibu bapo samo tabao

Bitu pulo codiak tau pandai.

Dayang jo panginang

Bungo satangkai ateh anjuang

Limpapeh rumah godang

Panyumarak korang kampuang

Imam Kotik Bila jo ongku luma

Urang alim dalan agamo

Surang tidak buliah tingga

Di lingkungan sombah kasadonyo.

Sobabnyo ambo dek badiri

Tak dek manatiang sombah

Iyo nak siang bak Ari

Elok di jombang nak nyo leba.

Comin toruh jogalo tubuah

Kok basiang di nan tumbuhan

Manimbang ateh nan ado.

Tumbuhan sarupo iko kini

Maso kito mambuek kasapakatan

Manduduakan kamanakan kito

Manjadi anggota dpr.

Sabolun anyuk ka bapinteh

Manukuak sabolun kurang.

Kok luluh mako di lantai

Sulit mencari nan lah ilang

Basakik makosuk ka sampai

Bak ma irik awua sonsang

Puji jo syukur pado Alloh

Salawat jo Salam bokeh Nobi

Dek ukua jangko nan salapan

Koto  lapang nagori suci

Sunnguah bijak Patiah nan sabatang

Saroto kuto moggungan

manyusun adat jo limbago

Baratuh taun nan ka datang

olun leh tampak muaronyo.

Sajak datuak marajo Ali

ka bunda ruhun di parantauan

Sarak lazim adat nan kewi

Sampai kini bapakai juo.

Nan tongah marah dipang

Ma uni daratan cino 

Mambawo alat pandai tukang 

Longkok jo ukua dengan jangko

Nan bungsu rajo simarajo

Nan tingga di pulau omeh

Kahujan payuang lah sadio

Condo ka anyuk lahnyo pinteh

Cucu patiah nan sabatang

Jo datuak kutomanggungan

Ba silang sangketo datang

Jo lapang ati man damai an.

Pangulu di minang kabau

Kinilah samo menyadari

Urai pusoko dalam lunau

Ampia tabonam basolami

Tak dek limbago jo pisoko

Kuwek batanam nan bapucuak

Tagak dek adat jo pisoko

Terbangun soko nan lah lapuak

Kasiah kapado nan banyawo

Kobau kambing jo biri biri

Pangobek aka nan manjala

Naiak nan indak ka turun lai.

Mambayang batin ka nan lopeh

Pisang tobu jo kurambie

Nampaklah dek kito nan basamo

Joriah payah ka mambaleh guno

Tagantuang biluluak ka pinang

Nyato basuluah ka mato ari

Ka pananti tamu nan datang

Rumah godang olah nyo badiri

Ayam itiak kobau taronak

Indak batuka lah mak ananyo

Payung takombang ateh tunggak

Tandonyo olah keri adat kito

Kobiah lobiah maso nan kini

Iduk di zaman pambaharuan

Anjuang pemimpin naknyo tinggi

Nan rendah nak nyo kalindungan

Aka takumpa kok nyo tapakai

Hidup manyisiah dari nan basamo

Ba condo lidi di lua simpai

Lemah tak ado kagunonyo.

Sampai di niniak moyang

Curiang jo barih ka jadi pidoman

Rumah nan gedang batiang panjang

Sondinyo datang kadian

Kini corak nan lah berubah

Dulu tajajah kinilah monang

Sajak negara lah merdeka

Kini kito bangun sagala bidang

Jauh balain jo nan da ulu

Manuruk caro zaman kini

Rumah gedang ba pasang batu

Lah babeton bakarangko Bosi

Tapi samantang pun baitu

Dek balain jo nan da ulu

Sasuai jo kondak urang maju

Sasuai jo maso jo wakotu

Itu sobat kurononyo

Mangko ambo dek badiri

Mangombang bayang maso

Untuak ka bandiang maso nan kini

Kini karojo ka di mulai

Sapintak kito pado alloh

Sehat sajo urang nan mamakai

(Nan kito pilihan)

Umua panjang rasoki murah

Arwah rang tuo tuo

Banyak saketek nan di tinggakannyo

Barokah do a dari kito

Sompik mandapek kalapangan

Mati ketek mati gedang

Mati di pulau pandulangan

Kok sompik dapek kalapangan

Nan awuh dapek kasojuk an

Bayiak dunsanak nan di rantau

Dagang nan santai jo untuangnyo

Nan di lua minang kobau

Jauah dari maro dek du'a ko

Tubuah dihati badan salosai

Umua panjang rasoki murah

Punyak buliah mukosuk sampai

Kok amalan batambah tambah

Nan ba ayam jo ba itiak

Asia  sawah balobiah lobiah

Nan taronak bakombang biak

Padi masak jaguang ma upiah

Sabuah punyak dari ambo

Kok indak topek di ukuran

Nan boneh simpan ka puro

Nan paik samo kito luahkan

Nyampah ba tuka dari ukua

Sulik jo senjang mamakaikan

Nan manih samo kito lulua

Nan ampo samo kito buang

Akhia kato ujuangnyo kalam

Kurang lobiah jo ampun panukuaknyo

Nan bona darinyo Tuhan

Nan salah nan  dari ambo

Kapado alim jo ulama

Kato abih rundiang salosai

Bacolah du'a nan sapatah

Tando karojo ka bamulai

Tando adat basandi syarak 

Syarak pun basondi kitab

Samakin kokoh tompek togak

Salamat di dunia sampai akhirat.

Assalamu'alaikum warohmatullohi wabaarokaatuh.

http://www.google.com

============°====°=°==°

gurindampusako

PIDATO ADAT.

SALAM JO SAMBAH

Bodia japun di bangkahulu

Panembak kopa dari bangko

Bori ampun kami dek pangulu

Jaweklah salam kami nan ko

Andak ka gunuang sikalebuk

Andak karimbo kayu jati

kayu godang banyak babuah

Katigo jo kayu karamat

Gagok gonta badan manyobuk

Panghulu banyak nan sati

Rang godang banyak nan batuah

Nan mudo banyak nan kiramat

Soluak ado deta pun ado

Ba kain panjang tigo holai

Di sosah anak urang padang

Di sosah dima lah ka di ampai an

Iyo di langkan iko juo

Datuak ado sutan pun ado

Apo lai nan codiak pandai

Ragulah mato dek mamandang

Kamalah sombah di tibokan

Iyo kapado kito nan basamo

SALAM sa ujuk dengan simpuah,

 ibarat bungka nan piawai,

naraco luruh main daun

 indak basibak jo basisiah

 indak babateh jo bahinggo.

SALAM kapado niniak mamak 

nan godang bosa batuah,

 sandi andiko dalam kampuang 

tampuak jo tangkai dinagori, 

kapoi tompek rang batanyo

kapulang tampek babarito.

Nan bak kayu godang di tongah koto

, ba urek balimbago motan, 

badahan cupak jo gantang,

 barantiang barih jo balabeh,

 badaun rimbun jo adat,

babungo mungkin jo patuik, 

babuah kato nan bona.

Buliah baselo di ureknyo, 

dapek basanda di batangnyo 

gantungan cupak nan duo,

 partamo cupak usali

kaduo cupak buatan.

SALAM kapado hulubalang jo panglimo 

saroto manti pagawai adat, 

parik dalam pagagaran kokoh ,

 urang na codiak candokio,

 tau sarato pandai,

tau dirantiang ka mancucuak, 

tahu di dahan ka mahimpok

 sarato ronggeh ka manyanggo,

 poham jo kieh kato bayang, 

takilek ikan dalam ayie, ikan

takilek jalo tibo, lah tontu jantan batinonyo

, santan dirumah lah

barameh.

SALAM kapado baliau angku nan tuo, 

alim ulama cadiak pandai, bila

maulana jo tuangku 

sarato imam dengan chatib,

 urang arif bijaksano,

togaknyo rintang dek  bapituah, 

duduaknyo rintang bacomin kitab,

 nan tau di halal dengan haram

 sarato sah dengan batil, 

palito nyalo maso di dunia,

 bendangnyo sampai ka akhirat.

SALAM kapado nan mudo salendang dunia

, nan capek kaki ringan tangan,

capek kai indak panaruang,

 ringan tangan indak pamocah, 

asa tarontang duo sudah, 

bahati suci bamuko janiah, 

nan tau di malu dengan sopan

sarato raso jo pareso,

 raso dibao naiak nan pareso di bao turun.

SALAM ka pado bundo kanduang,

 limpapeh rumah nan gadang, 

sumarak anjuang paranginan,

ibarat bungo di halaman, 

hiasan didalam kampuang 

pamenan dalam nagori,

kok hiduk tompek baniat, 

mati tampek ba naza, 

ka unduang- unduang ka

madinah, ka payuang panji ka sarugo, 

amban puruak aluang bunian,

 urang nan duduak jo sukatan

,kok hauih tampek mintak ayie,

 liyak ka tompek minta makan.

Ujuik kato buah rundingan, 

sakironyo poham di kahondaki, 

bahubuang jomaso nan ditampuah, 

dek maliek di ateh rupo, 

basiang ateh nan tumbuah,

tumbuah sarupo iko kini.

syariat ado bahakikat, 

lahie kulik manganduang isi, 

dilua nan tampak nyato,

 didalam kandungan ilmu

, jikok dipiliah jo ikhtiar, 

jikok aka dijalankan

, jo tanang budi marangkak, 

ka ateh nyato ta ombun jantan, 

kabawah joleh takosiak bulan.

Lahie manjadi buah amal,

basilek dipangka korih, 

malinteh di ujuang padang, 

kato salalu ba umpamo, 

rundiang nan banyak bakiasan.

Baa sakarang nagko kini,

 pihak diambo nan baru datang,

 sararak langkah dari rumah,

 sa ayun lenggang di nan goloang, 

manuju kampuang iko nangko,

Didoroang dek kondak bona

Di elo dek cinto hati

Dicubo cubo baraja

Tandonyo cinto ka nagori

Walau dima bumi dipijak

Disinan langik kito jujuang

Tapi bukan alasan nan bijak

Untuak kito lupo jo kampuang

Adat dikundang poi

Kok sara' lakek di tubuah

Walau ka tingga di lua bumi

Dipakai bapantang lusuah

Tapi.....Saketek nan mancomeh

Ragu tibo bimbang nan datang

Kato taserak olun lai komeh

Pado cukuk  banyak nan kurang

Bak manetek niro pinang, 

Ontah barayie ontah indak,

 bak alu patah patigo,

 musim pabilo kabataruak.

Badan umpamo padi salibu, 

awak tumbuah musim talampau. 

urek bagantuang kajarami,

 rangkiang tinggi nan bahadang.........

.masuak karuang raso ka indak

, tampan kalapuak salamonyo.

Comeh bona badan sabatang, 

ka tunggak ampulua kayu,

 ka papan lebanyo tangguang,

 tampan ka jadi sibiran sajo, 

antah kok rela dunsanak bari

Tapi  dek punco olah tarosok

Colak colak ka gonti asah

Sambie manunggu tukang tibo

Ambo cubo cubo manarah

Dunsanak tingga mangotam sajo

Kok indak di garih nan bapahek

Indak di takuak nan batobang

Taconcang lauak tongah olek

Tasobuk badan di nan sumbang

Kalilawa dipulau rimbang

Anak ruso mati tadobiah

Kok gawa toloang di timbang

Kok doso ampunkan nan lobiah

Cupak ponuah gantang balanjuang

Nyampang basuo saliter indak

usah salahkan sarueh botuang

Ambo manggantang nan kurang bijak

Untuak dunsanak kasadonyo, 

dek lah banyak dunsanak nan datang, 

dek biaso juo manuruik adat nan bapakai

, cupak tagak nan ba isi,

 kok mulia olek dibao duduak, 

mulia tamu di bao naiak.

baa sakarang nangko kini...............

Satontangan dunsanak kasadonyo

, ketek indak disabuik namo,

gadang nan indak disabukan gola

, sambah nan jatuah ka tongah tongah,

rundiang talewa ke nan rami.

Datang kok indak tapabasokan, 

tibo kok indak tamuliakan,

 himbau kok indak tasahuti, 

tanyo kok kurang dapek jawek,

maklumlah dunsanak tontang itu .

Dek sulik balega di nan sompik,

 sorik manuka di nan tidak, ditambah

pulo kakurangnyo.

Darah nan baru satampuak pinang, 

umua umpamo satahun jaguang,

 aka bolun pandapek kurang, 

ulemu jauah sakali,

 tinggi badan di bao rueh,

gopuak hanyo di bao lomak

Baa toh sakarang kini nangko.

Tambilang dibaliak lansek

Sitoba dirumpun sorai

Ambo bilang sado nan dapek

Nan tingga untuak rang nan pandai

Tungkek galah amat di rajo

Salibu dibaliak papan

Kok salah tobatlah ambo

kok bona samo kito amalkan

Didalam surek nan ka tigoko

Ambo cubo manyampaikan

Posan dari kito basamo

Untuak anak kamanakan

Kok untuang elok rotak tangan

Talakik mumbang jadi kalapo

Dek dunsanak toloang simakkan

Pasan untuak kito nan basamo

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

http://www.google.com