SORAH TARIMO ANAK KAMANAKAN

MANOLAH DATUAK.....

BASOBAB DATUAK SURANG NAN BATUNTUK.

TAGA DEK BARIH JO BALOBEH

SUNGGUAH DAUTUAK SURANG NAN TASOBUK

BUKAN DEK BA INGGO JO BABATEH.

URANG GODANG  BOSA BATUAH

ANDIKO PANGULU ADAT

KA OMPEK SUKU DI NAGORI

NAN MAMOGANG SOKO ADAT

DUBALANG JO OMPANG LIMO

MANTI SAROTO PAGAWAI ADAT

PAHUBUANG KATO DI NAGORI

NAN  MANJADI PARIK PAGA

NAN MUDO PALAWAN DUNIA

CODIAK PANDAI SAMO DIDALAM

UMUMNYO URANG OMPEK JINIH

DILINGKUANG SOMBAH AMBO JUO

.

UJUK MUKOSUK BUAH RUNDIANG

POHAM NAK SAMO DI DALAMI

DI NAN TUMBUAH IKO KINI

BAGANTANG RASO KA PONUAH

BATANDO RASO LAI KA CUKUK

SOBAB DEK SUDAH MINUM MAKAN

KOK MAKAN NYATOLAH KONYANG

TIBO DI MINUM LAI OLAH PUEH

TANDO MAKAN LAI KONYANG 

BALOBIAH NASI PATAMBUAHAN 

TANDO MINUM LAI PUEH

BASISO AYIA DI GALEH.

MAMANDANG NAN SARUPO ITU

TAKANA AMBO JO PAPATAH

PAKAIAN LUHAK NAN BUNSU

LAZIM DIALAM MINANG KABAU

KALAU BATANYO LOPEH ORAK

JIKOK BARUNDIANG LOPEH MAKAN

ADAT ELOK LIMBAGO RANCAK

BAPAKAI SAPANJANG ZAMAN

ALUALAH SAMO KITO TURUK

TIBO DI CUPAK NAN BALILI

KINI TAKONA NAK MANYOBUK

IZIN DARI DATUAK KAMI NANTI

SAKIAN SAJO PANYOMBAHANNYO,

MAK OLUN PULANG BAKEH DATUAK.

===============================

LAH SAMPAI DEK DATUAK

NAN SAPANJANG RUNDIANGAN DATUAK TU

UNTUAK JAWBAN KATO KAMI

DEK DATUAK PINTAK BALAKU

DI BATIN KAMI MANYUKURI

DIDALAM ADAT NAN BAPAKAI

DILIMBAGO NAN KITO TUANG

NAK ULAM PUCUAK MANJULAI

SUMUA DI KALI AYIA NAN DATANG

KALAU NAN NIAT DALAM ATI

DI BATIN DATUAK KANLAH TAU

MANSIANG DI AMBIAK KINI

NAN SUMPIK SUDAH DAULU

TANDONYO YO BA ITU

PANGGIA DATUAK NYATOLAH MULIA

TIBO DI IMBAU BASAHUTI.

PIHAK DI KAMI NAN BASAMO

TAGAK DEK BUEK NAN MALINGKA

JONJI OLAH BATOPOTI

DARI JAUAH OLEK LAH DATANG

NAN AMPIANG TIBO DA ULU

DATANG NAN BA LOMBAI LOMBAI

TIBO JO ARAK IRIANG

MASUAK KA KORONG KAMPUANG  DATUAK

.SAMPAI DI TINGKEK ANAK JONJANG

MALANGKAH PANGODAN NAN  LINTANG

DUDUAK BARADAT TONGAH RUMAH

BARIRIK DI RUANG TOPI

BASUSUN DI TONGAH RUMAH

BAMAIN EREANG GENDEANG

BATIMBANG BASO BASI

MANURUK ADAT JO LIMBAGO

MAMBAYANG NIAT NAN LAH SAMPAI

UJUANGNYO KAWUA SALAMAT

TOGUAH NAN BOLUN BAPAMOCIKAN

KOKOHNYO BOLUN BA PA MOGANGAN

.BAKATO BALUN BAKASUDAHAN

UNJUAK NAN BOLUN BABORIKAN

ILIA NAN TAK TAMPAK MUARONYO.

WALAU TAKUNGKUANG DEK BICARO

SABOLUN KA TAPAK TANGAN

HATI DIDALAM RAGU JUO

NAK NYATO SIANG BAK ARI

NAK OSAH TORANG BAK BULAN

LOPEH NAN DARI TAPAK TANGAN KAMI

KINI KA DATUAK BASORAHAN.

MUDO DEK KETEK JOLONG GODANG

ULEMU OLUN SACUKUK NYO

UMUA SINGKEK PANDAPEK KURANG

BIMBIANG DEK DATUAK JO BICARO

NYAMPANG TALANGGA BIO BARIH

DILUA MUNGKIN JO PATUK

KOK SOSEK BAOK KAMBALI

TALANGGA GONJUA LAH SURUK

USAH DI PUJUAK JO PATANGIH

LAI BAJAWEK BAGAMANG KAN

SUMBIANG KOK SAMPAI MALUKO I

DATUAK NAN USAH BALOPEH TANGAN

.KAMI NAN BALIHIA GONTIANG

DATUAK NAN BASOKIN TAJAM

BAK BULU LOKEK DI PUNTIANG

UTANG NAN USAH KA MANGGONGGAM

LIMBAK NAN DARI PADO ITU

KATO SAPATAH NAN DI PINTAK

KITO DEK URANG NAN BAJAUAHAN

.DAGO DAGI JIN DI KAKI BUKIK

DI BAWAH MEJAN  NAN TATOGAK

IMANAT USAH DI LUPOKAN.

SAKIAN SAJO PINTAK KAMI

MAK.OLUN PULANG BOKEH DATUAK.

===============================

JAWAB NYO.

LAH SAMPAI DEK DATUAK

SAPANJANG RUNDIANG DATUAK CAKO

SAREK DEK ANDAI JO BIDARAN

SASUAI RUWEH JO BUKU

NAN BAK DI UKUA JO KIRATAN

DATUAK BATINGGANG DI NAN SULIK

LAUK MUSIMAN KIRO KIRO

KALAU NAN.MIRIH KA BA PALIK

NAN TARUAH BATARIMO

LIMBAK NAN DARI PADO ITU

DEK DATUAK  KETEK.MUDO MATAH

DEK.KAMI GADIH JOLONG GODANG

GODANGNYO TABAO DAHAN 

TINGGINYO DEK TABALUN RUEH

LAI BATUNJUAK BA AJARI

ULEMU NAN OLUN SACUKUKNYO

SASAGO LOBIAH DEK DATUAK

SAKENDI IMBUAH DEK KAMI

BUNGKA NARACO KATIAN SAMO

NAN SULIK BONA MALIEK AN

ULU MUARO SAMO DALAM

TAPI SAMANTANG PUN BAITU

SARAK MAMBOREK PADO BAPAK

ADAT MAMBOREK BOKEH MAMAK

UNTUAK SAMO KITO BAO

BOBAN NAK SAMO KITO JUJUANG

.NAN BOREK SAMO KITO PIKUA

DATUAK NAN USAH LOPEH TANGAN

RUSUAHKAN PATAH DEK MALONTUA

IBOKAN SURUK KA TUANGAN

SABOLUN KETEK LAH DI PAGODANG

SA BOLUN ILANG OLAH BACARI

GABAK DI ULU KOK MAMBAYANG

PAYUANG PANJI LAH MANANTI

SABOLUN HANYUK KITO PINTEH

SUPAYO BURUAK JAN TASUO

DATUAK MAMANDANG DALAM RA IB

AMBO MA INGEK DALAM JAGO

LAI TASANDA KA NAN GODANG

OLAH TA GANTUANG KA NAN TINGGI

NYATI PINUAH BAK BAGANTANG

TIBO SI CUPAK LAH BALILIH

.LOMBAK NAN DARI PADO ITU

TONTANG IMANAT JO PITUAH

ASOK KA BADAN DIRI AMBO

BAGO JIWA UJUANG KUKU

DI BAWAH TANAH NAN SIRAH

IMANAT SI POCIK JUO

SAKIAN SAJO KA JAWAB NYO.

http://www.google.com